Kidung tengah wengi..

Rinakit kidung tengah wengi,
Kairing kumebuling wedang kopi,
Kumeluning kukus menyan wangi,
Ganda arum ngebeki bumi.

Duh gusti....
Kang andum basuki,
Kang ngangkat sakehing bilahi,
Memala, durbala darubeksi.

Namung paduka sesembahan kita sami,
Papan panyuwunan kang kaesthi,
Papan sambat lan pamuji,
Puji donga kang nyawiji.

Paringana kekuatan,
Paringana keslametan,
Dohna seka godane setan,
tuntunen marang dalan kabeneran.

Kidung tengah sawah,,,

Esuk umun-umun...101018

Rikala liyane esih njingkrung kemulan sarung,

wis gumregah jumangkah menyang sawah.

Hawa adem lan pedhuting kabut ora ndadeake ati ciut,

kelingan sedulur kang neng sawah wis ngawe-awe njaluk dikudang.

Arepa wong liya nganggep nistha,
Arepa wong liya nudhuh rekasa,
Arepa wong liya nyawang separo mata,
Mbok menawa merga iri lan rumangsa.

Sedulurku iki pengaji,
Sedulurku iki akeh kang nggoleti,
Sedulurku iki melu nyumbang marang negri,
Sedulurku iki melu gawe seneng marang sesami.

Sliramu aja munafik,
Sliramu aja sirik,
Sliramu aja dodolan milik...

Njur nudhuh sedulurku kanthi tembung kang nglarani ati,
Nudhuh andum memala lan bakteri,
Nudhuh nyebar pepati..

Nanging ngertiaaa!!!
Kanggoku sedulur andum rejeki,
Sedulurku melu ngangkat ekonomi...

Walangsemirang, 101018

Filosofi Kendhuren dalam Budhaya Jawa

Endahing pasrawunganing menungsa merga "kabungkus" budhaya lan bahasa.

Sedulur.....

Meh saben dina krungu sing jeneng misuh-misuh, maido, wadan winadan, cacat-cinacat ing antarane menungsa siji lan sijine. Mbuh sing secara langsung utawa via media cetak, elektrotik apamaning media sosial. 

Alesane beda-beda. 

Ana sing merga rumangsa kurang marem, rumangsa kurang seneng, kalebu rumangsa lewih pinter lan lewih bener, utawa ana uga sing merga ora kenduman jatah sing kudune pancen ora nrima.

Sakjane kuwe kabeh "hak_e dewek-dewek" ora perlu dipaido lan dikomentari.

Sedulur...

Rikala wulan Sura (Muharam) sebagian besar wong Jawa esih ngleksanaake sing jeneng Kenduren. Wujud tasyakuran ngunjukaken pandonga lan penyuwunan njur dibarengi sodakohan, utawa sedhekah. Ana pelajaran lan piwulang luhur kang kasimpen ing budhaya kendurenan hubungane karo mbangun sesrawungan kang bagus bisa andum katentremaning bebrayan.

Ayuhhh bareng-bareng sinau sesrawungan liwat budhaya KENDHUREN:

1.      Rikala ngaturi sedulur tangga teparo kon kenduren mawi tembung sing pantes lan luwes. Kaya umpamane, "nuwun sewu pak....... Sowan kulo diutus dening pak... Gegandhengan panjenenganipun saweg kagungan hajat, bapak katuran tindak wonten dalemipun saperlu kasuwun idi lan sawab pandonganipun ing mugio kersanipun saged kasembadan. "Endahing bahasa nentremake pasrawungan".

2.      Rikala wis kumpul, sing sepuh katuran lenggah ing duwur, sing enom kanthi legawa lungguh ing ngisor "ing klasa". "Endahing budhaya (unggah-ungguh) ngerti empan papan lan hormat maring kang sepuh.

3.      Rikala titi mangsa wis tumeka, kang kagungan hajat ngaturaken wigati lan hajate katerusake donga puji kapimpin "kaum/mudin". Dene liyane kanthi hikmad ngestreni njurung "AMIIIN" kang ateges atur pandonga mugio kasembadan sedyane.
"Endahing rasa, manunggal nyawiji dadi siji".

4.      Uborampe kendhuren, mulai tumpeng sak ingkunge banjur kabagi rata marang kabeh warga kendhuren. Kabeh ditampa kanthi rasa seneng, senajan nampan-e beda, tegese sing nampa gulu pitik ora protes, sing nampa ceker uga ora protes, senajan ngerti kancane nampa dada menthok utawa pupu pitik. "Endahing guyub rukun marang sepadhane".

Rikalane pamit bali, juga ora "mblonos", nanging pamitan mawi tembung, contone: "Kulo nekseni hajate, kepareng pamit wangsul" Wujud "pertanggungjawaban" merga wis diparingi "brengkesan brekat" lan merga disuwuni dadi seksi (nekseni) menggah hajate.
"Endahing budhaya lan bahasa, nuwuhaken katentremaning pasrawungan".

Merdi Desa Ruwat Bhumi Desa Logandu

Sadurunge menungsa diciptakna, wis digawe disit wujud bumi langit saisine. Ana piwulang sinandi tumrap uriping menungsa. Siapna disit bahan isining weteng sadurunge nyiapna liyane. Sebab weteng kuwe piranti sing bisa nguripi ya mateni, bisa nyebabna kepenak awak, nanging bisa nyengsarakna awak.
Akeh wong sing bisa urip mulya, kepenak rasane, seneng atine merga weteng.
Nanging ora sethithik wong sing cilaka, peteng nalare lan sengsara uripe, ya merga weteng.
Mula bhumi minangka sumbering panganing menungsa kudu tansah dirawat diopeni aja dirusak dimen uriping menungsa tetep kacukupan sandang pangane.

Ruwat uga ana sing maknani mbuang sengkala. Tegese: Bumi kang kudune dijaga lan diopeni, kasunyatan wis akeh sing rusak lan dirusak dening menungsa dewek.
Contone: Ndisit ora kebingungan golet banyu bersih nggo minum, nanging saiki akeh sing pada sambat kurang banyu. Anehe njur maido karo alam, kepara maido marang Pengeran.
Ndisit bhumi katon ijo royo-royo edi endah sinawang, oksigen turah. Saiki bhumi katon gersang panss pundho neng padang pasir utawa repat kepanasan.
Lan isih akeh kahanan kang wis owah gingsir rubah merga polahe menungsa. Mula perlu diruwat, di buang sengkalane, di lereni tingkah polah sing ora nggenah..

Wujuding pangruwat, donga, puji, usaha lan janji.
Donga puji lire menungsa aja lali, eling marang gusti kang wus nyiapake dalaning rejeki.
Usaha, tegese lamon ngerti tindakane nalisir, nyimpang dalan, ndang bali_a dalan sing bener.

Janji tegese nguataken atine niat lan semangat ninggal perkara sing salah, tumuju perkara sing ndadeake berkah.

Ngresiki rereged, nulak bilahi kudu mawi diusahani.
Katentreman lan kemakmuraning poro kawulo kudu di ikhtiari.

Sapa sing tanggungjawab?
Pangrehing projo, pangarsaning desa, nduweni kewajiban minangka pengayoman lan paran pitakonan tumrap para kawulane.

Mbarengi dina Rebo wage malem Kemis Kliwon, 14-15 Sura 1952 / Tahun BE, Bopo Sarlan Logandu minangka Kepala Desa Logandu lumantar pangarsaning Lembaga Masyarakat Peduli Adat Ki Gedhe Tanpa Aran nganaake pisowanan agung angumpulaken para Kasepuhan saperlu ambeber Merdi Desa "Ruwat Bhumi".
Kawiwitan mboyong "Tirto suci sendhang pitu" (Sumber Pedhukuhan Karanganyar, Totogan, Genggong, Srengseng, Mlakakerep, Benda, lan Kali Sapi).

TIRTO SUCI (banyu suci) ngemu teges: ngresiki samubarang dimen suci kudu kelawan banyu suci.
TIRTO WENING uga ngemu teges: Kanthi dasar weninging ati antebing kalbu minangka daya kekuatan kanggo ngudi panyuwunan pitulungan (SUMBER TUK PITU) marang dzat sing gawe jagat.

Pisowanan agung kang kawiwitan mawi tembang:

"Pepujanku nuswantara,
Bumi kelahiran mami,
Sun sesuwun mring pangeran,
Ing siyang pantaran ratri,
Tebihna tulaksarik,
Antuk nugraha hyang agung,
Tata tentrem raharja,
Adil makmur kang sejati,
Kondhang kumpul kuncara mring manca praja" 

Ngemu teges: manunggaling para Kasepuhan, kanoman, kawulo lan panguasa (pejabat) dadi gaman kang ampuh kanggo nggayuh sedyo luhur.

Puncaking acara Ruwat bhumi mawi serah terima "Tirto suci sumber tuk pitu" saking Ketua LMPA Desa Logandu Ki Gedhe Tanpa Aran ya Ki Gedhe Mardiadi kapasrahake Ki Dalang Siswadi Mudo Carito kang piniji angruwat Desa kanthi mbeber wayang kulit.